BANKA E SHQIPËRISË
NJOFTIM PER SHTYP
Guvernatori Sejko merr pjesë në konferencën e nivelit të lartë "Ripërshpejtimi i konvergjencës në Evropën Qendrore, Lindore dhe Juglindore- roli i qeverisjes dhe i institucioneve"
Data e publikimit: 11.07.2017
Në datat 10 -11 korrik 2017, Guvernatori i Bankës së Shqipërisë, z. Gent Sejko mori pjesë në konferencën e nivelit të lartë "Ripërshpejtimi i konvergjencës në Evropën Qendrore, Lindore dhe Juglindore - roli i qeverisjes dhe institucioneve", organizuar nga Banka Kombëtare e Kroacisë dhe Fondi Monetar Ndërkombëtar (FMN) në Dubrovnik, Kroaci. Përveç përfaqësuesve të lartë të FMN, në këtë konferencë merrnin pjesë rreth 30 guvernatorë dhe ministra të financave nga vendet e Evropës Qendrore, Lindore dhe Juglindore (EQLJ), si dhe përfaqësues nga Komisioni Evropian, Banka Evropiane për Rindërtim dhe Zhvillim, Banka Evropiane e Investimeve, dhe nga institucione të tjera financiare dhe bota akademike.
Diskutimet e konferencës u përqendruan në çështje të tilla, si: Ku qëndron sot procesi i konvergjencës? Cili është roli i investimeve, demografisë dhe produktivitetit, si është perspektiva e konvergjencës për standardet e jetesës në vendet e EQLJ-së? Çfarë zhvillimesh priten në Bashkimin Evropian në kontekstin e një rritjeje globale më të ngadaltë dhe të një trendi më të pafavorshëm demografik afatgjatë? Cili është roli që kanë institucionet dhe qeveritë në këto procese?
|
|
Gjatë konferencës, Guvernatori Sejko mori pjesë edhe në tryezën e diskutimit, organizuar nga Drejtorja e Përgjithshme e Fondit Monetar Ndërkombëtar, zj. Christine Lagarde. Në këtë tryezë, Guvernatori diskutoi mbi kontributin që FMN-ja ka dhënë në vendet e EQLJ-së për realizimin e reformave dhe rolin që Fondi ka luajtur në forcimin e shoqërisë civile.
"... FMN-ja ka luajtur dhe vazhdon të luajë një rol të rëndësishëm në rajonin e EQLJ-së. Programet dhe këshillat e FMN-së kanë qenë vendimtare në vendosjen e rajonit në rrugën e duhur, nga tranzicioni drejt konvergjencës. Për më tepër, FMN-ja ka vazhduar të luajë rolin e rregullatorit sa herë që vendet e këtij rajoni janë përballur me vështirësi ekonomike dhe financiare", tha Guvernatori. Për ta ilustruar këtë rol, ai solli si shembull marrëveshjen e fundit midis Shqipërisë dhe FMN-së, e cila u konsiderua si një domosdoshmëri dhe zbatimi i saj përfundoi me sukses. Në kuadër të kësaj marrëveshjeje, Shqipëria vazhdoi ritmin rritës të ekonomisë dhe ndërmori një sërë reformash strukturore.
Për sa i përket rolit të FMN-së në të ardhmen, Guvernatori u shpreh se ky rol mund të jetë më fleksibël dhe më eficient, duke kontribuar në forcimin e masave parandaluese të krizave të mundshme dhe në arritjen e objektivave finalë.